ކޮންޓްރެކްޓެއް ހަވާލުކުރާނޭ އެކަށީގެންވާ ޤާބިލު ފަރާތެއް ކަނޑައެޅުމުގައި، ތިރީގައިމިވާ ގޮތުގެމަތިން ކޮންޓްރެކްޓަރުން ޕްރީ-ކޮލިފައި ކުރެވިދާނެއެވެ.
- އެ ކޮންޓްރެކްޓެއްގެ ދަށުން ގަންނަން ބޭނުންވާ ތަކެއްޗަކީ ނުވަތަ ކުރަން ބޭނުންވާ މަސައްކަތަކީ ނުވަތަ ހޯދަން ބޭނުންވާ ޚިދުމަތަކީ ވަކި ޚާއްޞަ ހުނަރެއް ބޭނުންވާ ނުވަތަ ވަކި ގޮތްތަކެއް ކަނޑައެޅިފައިވާ ނުވަތަ އެކަމެއް ފަރުމާކުރުމުގެ ތަފުސީލު ބޭނުންވާ ކޮންޓްރެކްޓަކަށްވުން.
- ބީލަން ތައްޔާރުކުރުމަށް ކުރަންޖެހޭ ޚަރަދު ބޮޑުވުމުގެ ސަބަބުން ބީލަމުގައި ބައިވެރިވާނޭ ފަރާތްތައް މަދުވެ، ވާދަވެރިކަން ކުޑަވެދާނެ ފަދަ ކޮންޓްރެކްޓަކަށްވުން.
- ހުށަހެޅޭ ބީލަންތައް ތަފުސީލުކޮށް ދިރާސާކުރަން ޖެހުމާއި، ގިނަ އަދަދެއްގެ ބީލަންތައް ދިރާސާކުރުމަށްޓަކައި ވަގުތު ހޭދަވުމާއި، ސަރުކާރުގެ އިދާރާއަކުން އެކަމަށް ކުރަންޖެހޭ ޚަރަދު ބޮޑުވެދާނެފަދަ ކޮންޓްރެކްޓަކަށްވުން.
ދައުލަތުގެ އޮފީހަކުން ކޮންޓްރެކްޓަރުން ޕްރީ-ކޮލިފައި ކުރަނީނަމަ، އެކަމަށް ޝަރުޠު ހަމަވާ ހުރިހާ ފަރާތްތަކަށް ޕްރީ-ކޮލިފައިވުމަށް ފުރުޞަތު އޮންނާނޭހެން މި ގަވާއިދުގެ 10.38 ވަނަ މާއްދާގައިވާ ގޮތުގެމަތިން އެކަމެއް އާންމުކުރަންވާނެއެވެ.
ޕްރީ-ކޮލިފިކޭޝަނުގައި ބައިވެރިވުމަށް އެދޭ ހުރިހާ ބީލަންވެރިންނަށް ޕްރީ-ކޮލިފިކޭޝަން ބީލަންފޮތް ދޫކުރަންވާނެއެވެ. މިގޮތުން ދޫކުރެވޭ ބީލަންފޮތުގައި، ޕްރީ-ކޮލިފިކޭޝަން ކްރައިޓީރިއާއާއި ޕްރީ-ކޮލިފިކޭޝަން ޝަރުޠުތައް، އަދި ބީލަންފޮތް ފުރިހަމަކުރާނެ ގޮތާއި ހުށަހަޅާނޭ ގޮތުގެ މަޢުލޫމާތު ހިމަނަންވާނެއެވެ.
ޕްރީ-ކޮލިފައިކުރެވޭ ހުރިހާ ފަރާތްތަކަށް ބީލަމުގައި ބައިވެރިވުމުގެ ފުރުޞަތު ދޭންވާނެއެވެ.