ރައްޔިތުންގެ މަޖިލީހުން ހުއްދަ ލިބިގެން މެނުވީ ރައްޔިތުންގެ މަޖިލީހުން ފާސްކޮށްފައިވާ ދައުލަތުގެ ބަޖެޓުގައިވާ މިންވަރަށްވުރެ އިތުރަށް ޚަރަދުކޮށްގެން ނުވާނެއެވެ. އަދި ބަޖެޓުގައި ވަކި ކަމަކަށް ޚަރަދެއް ކުރުމަށް ކަނޑައަޅާފައިވާނަމަ، އެ ޚަރަދެއް ކުރަންވާނީ އެކަމަކަށެވެ.
އަންނަނިވި ހާލަތްތަކުގައި މެނުވީ އެއްވެސް ފަރާތަކުން ދައުލަތުގެ ފައިސާ ޚަރަދުކުރުމަށް ހުއްދަދީގެން ނުވާނެއެވެ.
- ޚަރަދުކުރުމަށް ބޭނުންވާ މިންވަރަށް، ޤާނޫނީ ހަމަތަކުގެމަތިން ދައުލަތުގެ ފައިސާ ލިބެން ހުރުން.
- ޚަރަދުކުރުމަށް ބޭނުންވާ ފައިސާއަކީ މި ގަވާއިދުގައިވާ ގޮތުގެމަތިން، ޚަރަދުކުރުމަށް ހުއްދަކޮށްފައިވާ ފައިސާއަކަށްވުން.
އެއްވެސް ޚަރަދެއް ކުރަންވާނީ، އެ ޚަރަދެއް ކުރުމަށް ހުއްދަދިންކަމަށް ފައިސާ ޚަރަދުކުރުމަށް ހުއްދަ އޮތް ވެރިޔަކު ހުއްދަދީ ސޮއިކުރުމުންނެވެ.
ޚަރަދުކުރުމަށް ހުއްދަދޭ ވެރިން ކަނޑައަޅާނީ އެ އޮފީހެއްގެ އިސްވެރިޔާގެ މަޝްވަރާގެ މަތިން މާލީޒިންމާދާރުވެރިޔާއެވެ.
މި މާއްދާގެ (ރ) ގައިވާ ގޮތުގެމަތިން ޚަރަދުކުރުމަށް ހުއްދަދިނުމަށް މާލީޒިންމާދާރުވެރިޔާ ކަނޑައަޅާ މުވައްޒަފުންގެ މަޢުލޫމާތު މިނިސްޓްރީ އޮފް ފިނޭންސްއަށް ފޮނުވަންވާނެއެވެ.
ބަޖެޓުން ކުރަންޖެހޭ ޚަރަދުތައް ކުރަންވާނީ، އެކަމަށް ބަޖެޓުގައި ކަނޑައެޅިފައި އޮތް އަދަދަށްވުރެ އިތުރުނުވާނެ ގޮތެއްގެމަތިން އެ ޚަރަދެއް ކުރަން އެންމެ އެކަށޭނަ ބަޖެޓްކޯޑުންނެވެ.