މުސާރައާއި، އެކިއެކި އެލަވަންސާއި، އިތުރުގަޑީގެ ފައިސާއާއި، މިނޫންވެސް މުވައްޒަފުންނަށް ދޭންޖެހޭ އެއްވެސް ފައިސާއެއް ދިނުމުގައި ދޭންޖެހޭވަރަށްވުރެ އިތުރަށް ފައިސާ ދެވިއްޖެނަމަ، ފައިސާ އިތުރަށް ލިބުނު މުވައްޒަފެއްގެ އަތުން އެ ފައިސާ އަނބުރާ ހޯދަންވާނެއެވެ.
މި މާއްދާގެ (ހ) ގައިވާ ގޮތުގެމަތިން އިތުރަށް ދެވުނު ފައިސާގެ އަދަދަކީ އެ މުވައްޒަފަކަށް މުސާރައާއި އެލަވަންސަށް މަހަކަށް ލިބޭ ޖުމުލަ އަދަދުގެ %20 (ވިހި އިންސައްތަ) އަށްވުރެ ކުޑަ އަދަދެއްނަމަ، އެއްފަހަރާ އެ ފައިސާ ހޯދަންވާނެއެވެ.
މި މާއްދާގެ (ހ) ގައިވާ ގޮތުގެމަތިން އިތުރަށް ދެވުނު ފައިސާގެ އަދަދަކީ އެ މުވައްޒަފަކަށް މުސާރައާއި އެލަވަންސަށް މަހަކަށް ލިބޭ ޖުމުލަ އަދަދުގެ %20 (ވިހި އިންސައްތަ) އަށްވުރެ ބޮޑު އަދަދަކަށްވެފައި، އަދި އެ ފައިސާ އެއްފަހަރާ ދެއްކުމަށް އެ މުވައްޒަފަކު އުޒުރުވެރިވާނަމަ، އެ ފައިސާ ހޯދާނީ މާލީޒިންމާދާރުވެރިޔާއާއި އެ މުވައްޒަފަކާ އެއްބަސްވާ ގޮތެއްގެމަތިންނެވެ. މިގޮތުން މަހަކަށް ކެނޑޭނެ އެންމެ ކުޑަ އަދަދަކީ އަސާސީ މުސާރައިގެ %20 (ވިހި އިންސައްތަ) އެވެ.
މި މާއްދާގެ (ހ) ގައިވާ ގޮތުގެމަތިން މުވައްޒަފަކު ދައްކަންޖެހޭ ފައިސާ ދައްކަން އެންގުމުން، އެ ފައިސާ ނުދައްކައިފިނަމަ، އެ މައްސަލަ ނިންމާނީ ޝަރުޢީ ކޯޓަކަށް ހުށަހަޅައިގެންނެވެ.
މުސާރަދޭ ދުވަހު ދިމާވާ މަޤުބޫލު ސަބަބަކާހުރެ ހުރިހާ މުވައްޒަފުންނަށް މުސާރަ ނުދެވިއްޖެނަމަ، ޖެހިގެން އަންނަ ދުވަހު ނުވަތަ ވީއެންމެ އަވަސް ފުރުޞަތެއްގައި މުސާރަ ނުދެވި ތިބި މުވައްޒަފުންނަށް މުސާރަދީ ނިންމަންވާނެއެވެ.