މި ގަވާއިދުގެ 10.40 ވަނަ މާއްދާގެ (ހ) ގެ 3 ވަނަ ނަންބަރުގައިވާ ގޮތުގެމަތިން، ދައުލަތުގެ އޮފީސްތަކުން ހުޅުވާލާ ބީލަމުގައި ބައިވެރިވުމުގެ ފުރުޞަތު، އެކަމަކަށް ޝޯޓްލިސްޓްކުރާ ފަރާތްތަކަށް އެކަނި ދޭގޮތަށް ހަމަޖައްސާނަމަ، އެފަރާތްތައް ޝޯޓްލިސްޓްކުރަންވާނީ ތިރީގައިމިވާ ގޮތްތަކަށް ބަލާފައެވެ.
- މި ގަވާއިދުގެ 10.23 ވަނަ މާއްދާގެ (ނ) ގެ 1 ވަނަ ނަންބަރުގައި ބުނެވިފައިވާ ފަދައިން، އެކަމެއް ކުރަނީ މަދު ނުވަތަ ވަކި ފަރާތްތަކަކުން ކަމަށްވުން.
- ޝޯޓްލިސްޓްކުރުމުގައި އެކަމެއް ކުރަމުންގެންދާ ތަޖުރިބާހުރި މަދުވެގެން 3 (ތިނެއް) ފަރާތެއް ހިމެނުން.
ބީލަމުގައި ބައިވެރިވާ ފަރާތްތައް ޝޯޓްލިސްޓްކުރުމުގައި، އެ ބޭނުންވާ ކަމެއް ފުރިހަމަ ނުކުރެވޭނެކަމަށް ފެންނަ ފަރާތްތައް ޝޯޓްލިސްޓްކޮށްގެން ނުވާނެއެވެ. ޝޯޓްލިސްޓްކުރެވޭ ފަރާތްތަކަކީ ބޭނުންވާ މިންވަރަށް ޤާބިލުކަމާއި ފެންވަރާއި ހުނަރުހުރި ބަޔަކަށް ވާންވާނެއެވެ.
ބީލަމެއްގައި ބައިވެރިވުމަށް ޝޯޓްލިސްޓްކުރެވޭ ފަރާތްތަކަކީ އެއްފަރާތަކަށް ނިސްބަތްވާ ނުވަތަ އެއްފަރާތަކުން ކޮންޓްރޯލްކުރާ ފަރާތްތަކަކަށް ވެގެން ނުވާނެއެވެ.